ROTEIRO POLA COSTA DA VELA ORGANIZADO POR ADEGA

  O Foro Social de Cangas vos informa do roteiro organizado por ADEGA, asociación para a defensa ecolóxica de Galiza, que o domingo 18 sobre as once da mañán comezará en Donón, e vos invita a participar nel.

  Percorrerá o Facho, Cabo Home, Punta Subrido e os dunares de Nerga, Viñó e Barra. As seis e media da tarde se achegarán ate O Salgueirón para coñecer de primeira man a problemática do proxecto de porto deportivo, participar nun acto de solidariedade cos veciños que están a impedir a realización do brutal proxecto e realizar unha rolda de prensa as sete baixo a torre de Massó.

  Dende o Foro Social queremos aproveitar a oportunidade para reivindicar a ampliación do L.I.C (ligar de interese comunitario) Costa da Vela, pertencente á Rede Natura 2000 ate abarcar todo o espazo natural que aparece co nome de Cabo Home 6b nas Normas Subsidiarias Provinciais do ano 1990 da Consellería de Política Territorial, e que acaba nos terreos da antiga baleeira e inclúe Punta Balea, a punta de onde arrancaría o espigón do pretendido porto deportivo.

  Tamén denunciar o abandono no que se atopan as diferentes areas do concello pertencentes a Rede Natura, sufrindo incluso ataques como o desbroce salvaxe e inxustificado que que se está a levar a cabo estes días entre as praias de Menduiña e Lagoelas, pertencente ao L.I.C Cabo de Udra. 

  Pensamos que o coidado do medio ambiente é unha actividade que repercute directamente na calidade de vida dos habitantes de Cangas e mantén e potencia un dos seus atractivos principais cara ao exterior.

  Gustaríanos que se traballase en aumentar a conciencia ecolóxica colectiva, para conseguir entre todos un medio ambiente mais natural, limpo e productivo. Que non se esquecera a importancia e o peso real do sector primario, se tuvera en conta a importancia crecente da alimentación calificada como ecolóxica, e que se sometera ó urbanismo a un control rigoroso no que o ben común prevalecera sobre os intereses particulares. Solicitamos que as denuncias de irregularidades no litoral non queden só en meras palabras e as administracións actúen preservando a legalidade e o patrimonio colectivo.

  Tamén vos recordamos a importancia de participar na manifestación de mañán sábado as 21 horas en Nigrán por un urbanismo non depredador.
  Cangas a 16 de Xuño de 2006 
  FORO SOCIAL DE CANGAS

MARCHA EN DEFENSA DA COSTA DA VELA ORGANIZADA POR ADEGA

  Dentro da campaña en defensa da Rede Natura, ADEGA organiza este roteiro para reivindicar outro modelo de xestión para este (a Costa da Vela e o Cabo Home), e outros espazos costeiros do Morrazo de interese natural, hoxe ameazados pola especulación urbanística.

  Faremos tamén parada na vila de Cangas para coñecer e solidarizármonos coa problemática do porto deportivo de Massó.

  A Costa da Vela mantense como o pedazo de litoral máis salvaxe das Rías Baixas grazas á súa inaccesibilidade. Grandes penedías graníticas e impenetrables matogueiras de toxos e abruñeiros, que medran en ladeiras de forte pendente e soportan a marusía de vento e sal, son a mellor garantía da conservación deste espazo natural. Nestes cantís mariños, alén de matogueiras -grande parte delas magníficas representacións das matogueiras de acantilado, un dos hábitats de interese prioritario de conservación na Unión Europea-, atópanse as mellores mostras de pasteiros naturais e vexetación de rochedos mariños desta parte do litoral continental galego. Poderemos aprecialas desde o Alto do Facho, lugar histórico que se alza sobre a encantadora aldea de Donón, e onde se está a escavar un importante asentamento castrexo, que é unha desas privilexiadas atalaias onde se deleitar co mar, o bater das ondas e á vista das illas Cíes e Ons.

  O espazo natural Costa da Vela, declarado LIC (Lugar de Interese Comunitario) para integrar a Rede Natura 2000, tamén inclúe unha franxa de augas mariñas de elevado valor biolóxico e socioeconómico, así como praias e dunas de grande beleza e interese xeomorfolóxico e botánico: Melide, Nerga, Barra e Viñó, as dúas últimas santuarios do nudismo e das que de certo poderemos gozar neste roteiro. Pequenos redutos de carballeiras e de zonas palustres completan a vexetación natural desta paraxe, unha das mellores mostras do que outrora foron as paradisíacas Rías Baixas.