|
MANIFESTO
DO 19.03.05 CONTRA O PXOM QUE SE ATOPA EN EXPOSICIÓN
PÚBLICA
Homes e mulleres de Coiro, Cangas, Darbo,
Aldán e Hío.
A Lei do Solo de Galicia a
través dos plans xerais, persigue liberar a maior cantidade
de solo posible para a construción. Este solo, convertido
en edificable, non está destinado ós seus lexítimos
propietarios se non ós grandes construtores e promotores
inmobiliarios. Estamos a falar, entón, dun crecemento
baseado na especulación. Os plans xerais, pretenden ordenar
o territorio e protexer o medio rural e ninguén dubida da
necesidade de que Cangas conte con un.
Pero entendemos que
neste Plan Xeral nin se ordena o territorio nin se protexe o medio
rural. Así, dos 53 ou 59 núcleos rurais que había
en Cangas coas Normas Subsidiarias, só se conservan 7,
todos eles situados en zonas que non teñen interese para a
construción que se pretende. Tampouco se ordena o
territorio coa edificación masiva propiciada polo gran
número de bolsas que se inclúen, intentando deseñar
unha cidade turística enriba dun pobo, o que xera enormes
tensións: ó crearse grandes urbanizacións, de
miles de vivendas, coas rúas e estradas tan estreitas como
as que ten o noso concello (algunhas dunha soa dirección),
¿cómo van circular os coches polas parroquias e
mesmo por Cangas?. Non queda máis remedio que afectar os
terreos dos veciños para anchealas e crear accesos para as
urbanizacións.
O plan pretende aprobarse sen
realizar ningún tipo de estudio sobre a posible afección
ó medio ambiente, nin inclúe un estudio sociolóxico
sobre as verdadeiras razóns que o lexitimen, nin alerta
sobre as consecuencias que terá sobre o municipio.
Moitos
de vos vindes de queixarvos de que con este plan xa non poderedes
construirvos unha casa, e tendes razón. O PXOM ten entre os
seus sus obxectivos evitar que o solo urbano periférico e
os núcleos rurais podan crecer. En lugar de recoñecer
os núcleos rurais tradicionais existentes, este plan
colócanos áreas de reparto que impiden ós
veciños edificar no seu propio eido. Só se
concederán en todo o municipio de Cangas licenzas para
menos de 600 viviendas nas que un veciño poderá
construir a súa propia casa, obligando a que o resto do
solo se desenvolva en forma de urbanizacións de chalés
adosados e edificios. Teredes que entregar as vosas fincas ós
grandes constructores.
O Concello pensa crear unha Xerencia
Municipal de Urbanismo que impulsará e dirixirá o
desenvolvemento das 90 bolsas de solo que se queren crear por todo
Cangas. Nada máis aprobarse o PXOM, as cinco primeiras
bolsas teñen xa un prazo de dous anos para desenvolverse,
ou no caso contrario entregaranse a un axente urbanizador ou
edificador.
Os informes da Dirección Xeral de
Urbanismo da Xunta e de Costas do estado, alarman da edificación
masiva que se proxecta na costa e que ocupará un 40 % de
Cangas no que a propia Xunta denomina "gran malla urbana"
e "barreira ambiental" polo impacto que vai
ocasionar.
O 60 % restante queda protexido, símplemente
porque as leis non permiten construir nestos lugares por seren
montes veciñais, solo de protección de costas e
espacios naturais.
No PXOM aparecen claros tratos de favor
hacia determinadas personas, creando para a meirande parte de vos
problemas ó deixar moitas propiedades fóra de
ordenación. Pretenden xustificar este plan en base a falsas
premisas como que a situación socioeconómica e
urbanística de Cangas cambiou radicalmente nos últimos
10 anos, que no concello falta solo residencial, cando na
actualidade existen unhas 2.500 vivendas baleiras. Que na
parroquia de Aldán, que nos últimos 40 anos perdeu
15 habitantes, existe unha carencia de solo público (polo
que lles constrúen unhas 7.000 vivendas novas). En Massó
queren garantir e protexer o dominio público do borde
costeiro (por iso fan un porto deportivo con 600 m de espigón)
e conservar os elementos naturais (convertendo a lagoa nun
estanque).
Por todo o exposto, esta creación
desmesurada e repentina de vivenda non é produto dunha
necesidade real polo crecemento racional da poboación, se
non froito dunha operación inmobiliaria baseada na
especulación.
Cando se desenvolva todo plan, nun
prazo duns 15 anos, ninguén recoñecerá ó
noso pobo, xa que desaparecerán a práctica
totalidade das fincas de cultivo (máis de 5 millóns
e medio de m2), pasando os vales de Coiro, Aldán e Darbo a
ser urbanizacións de chalés adosados.
Tamén
desaparecerán miles de m2 de zonas forestais, ademais dos
que xa arrasou a vía rápida. As zonas altas do Monte
Varalonga e de Menduiña terán incluso máis
volumen de edificación que as zónas próximas
ós núcleos, creando barrios altos de "señoritos"
como acontecían nos tempos feudais. Estas urbanizacións
contarán con tódolos equipamentos vertendo as augas
residuais hacia os barrios desfavorecidos, ós que
expropiarán para instalar as redes de sumidoiros,
depuradoras e viais de acceso ás praias.
Por Lei
deben crearse zonas verdes para todo o municipio, e este plan
ubica estas zonas verdes para pasear en zonas marxinais,
intransitables, non edificables e protexidas por lei como a Serra
da Madalena (con pendentes de >50% e que ademais debería
ser monte comunal), a Lagoa de Vilariño (protexida por lei
e que será expropiada), cauces de ríos e rede
natura, así como equipamentos como a cidade deportiva que
tamén se expropiará ós veciños.
Por
lei, uns 300.000 m2 son Dominio Público e servidume de
libre tránsito polos nosos ríos. No plan pasan a ser
as zonas verdes a cambio de edificar as zonas de cultivos.
Os
convenios, que o concello asinou con determinados promotores no
pasado verán, iniciaron o que o plan xeral quere
rematar.
O convenio Aldán pretende recalificar máis
dun millón e medio de m2 de Solo non Urbanizable de
Protección Forestal afectando a unha das zonas verdes máis
importantes das Rías Baixas, protexida en parte pola
proposta de Rede Natura, durante xeracións de uso público,
e que por dereito debería pertencer ós veciños
de Aldán na forma de montes veciñais. A propia
Consellería de Política Territorial comunica ó
concello que non se entende esta recalificación dos montes
de Menduiña que non garante que se estrague a importancia
paisaxística e ecolóxica do espazo da Rede
Natura.
Doutra banda, o convenio de Massó pretende
recalificar case 200.000 m2 de Solo Urbano non Consolidado, con
calificación predominantemente industrial, que afecta a un
conxunto histórico, artístico, cultural e
medioambiental de importancia extraordinaria para a identidade do
pobo de Cangas. Dominando o conxunto atópase a fábrica
de conservas de Massó, edificio de Interese Cultural ó
ser a maior fábrica de conservas de toda Europa. 4.000 m2
dos ocupados pola fábrica son DPMT, e dado que na
actualidade non teñen ningún uso relacionado co mar
poden legalmente ser reclamados polo concello para uso público.
O
porto deportivo de Massó estragará unha importante
zona pesqueira en contra dos intereses dun importante sector
económico da vila, o mariñeiro, que nos da gran
parte da idiosincrasia do que somos. Tamén está
previsto instalar outro porto deportivo en Aldán.
¿A
quen prexudica este plan? Claramente ós veciños e
veciñas das cinco parroquias do municipio, ós que se
lles impide reservar as propiedades para que os fillos e netos
podan construír a súa casa. As leiras que os nosos
avós traballaron, e nas que deixaron a vida malvivindo para
deixarllas ós fillos, pasan agora a mans de AXENTES
URBANIZADORES controlados polo concello. ¿onde está
o dereito á propiedade privada?
¿Pode o
consistorio facerse dono das nosas vontades e impoñernos o
deixar de vivir nunha zona rural e meternos de cabeza nunha cidade
sen unha consulta popular? ¿Por qué non se realiza
un estudio económico que demostre os beneficios que os
habitantes deste concello recibiremos de aprobarse un plan xeral
destas características? Un estudio que demostre unha
efectiva creación de postos de traballo, onde se analicen
as ganancias das revalorizacións dos terreos que se
recalifican pero tamén as perdas polas afeccións
recibidas coa necesidade de encher as parroquias con viais máis
anchos, así como os custos que soportaremos con novos
impostos municipais para garantir o mantemento de tanta
infraestructura.
Nada gañamos co novo Plan Xeral. O
folleto que o Sr. Sotelo enviou ás nosas casas nos dá
como logros infraestructuras que xa existen, outros que son montes
veciñais e portos deportivos que se farán sobre o
mar, polo que nada teñen que ver co plan.
Vendéusenos
unha vía rápida que nos comunicaría co resto
do mundo e que serviría para dar servizo ó parque
empresarial da Portela, cando na realidade vai servir para
especular urbanísticamente coa parroquia de Aldán.
¿que pasa co parque empresarial? ¿onde están
os postos de traballo? ¿que traballo nos ofrecen ó
convertir o noso concello nunha cidade turística? ¿que
pretenden, traballo estacional mal pagado e emigración para
a xuventude?
Se nos di que queren facer de Cangas unha
cidade, pero isto será a costa de sacrificar o noso espazo
vital, superpoñendo un entramado de cidade sobre o actual
entramado de vila. A actual densidade de poboación de
Cangas, con 642 habitantes/Km2 é similar á de Marín
e Pontevedra capital. Nun futuro inmediato, se se aproba o novo
plan xeral, haberá unhas 30.000 vivendas e seremos preto de
100.000 habitantes (entre residentes e propietarios de 2ª
vivenda), creando un gran entramado urbano que unirá todo o
territorio das parroquias de Coiro, Cangas, Darbo e Aldan e parte
da do Hío. Unha poboación cuns 45.000 vehículos
distribuídos polo 40 % do territorio, ós que habrá
que engadir outros miles de visitantes e vehículos no
verán.
Os escasos equipamentos existentes e os novos
que se creen, pasarán a estar compartidos polos casi
100.000 habitantes.
¿Poderemos ir á praia?
¿onde aparcaremos?
Tendo en conta que moitos dos novos
adosados terán cespede e piscina ¿quen nos garante o
subministro de auga ós actuais habitantes deste
concello?
¿quen garante que o noso comercio, as
pequenas empresas, pequeños supermercados, etc. poderán
competir coas grandes superficies que se van construir?
O
encarecemento da vivenda producida pola priorización do
sector turismo, e a falta de previsión de postos de
traballo, conlevará a emigración da poboación
xoven e sen recursos.
O municipio de Cangas pasará a
contar con 4 portos deportivos co que isto conleva de
contaminación, o que unido á contaminación
polos vertidos de aguas residuais, suporá unha gran presión
para o ecosistema das rías, xa que os días de chuvia
as augas alivianse sen depurar.
Ninguén dubida da
suba de impostos locais para manter as novas infraestructuras e o
encarecemento do nivel de vida, incluido o peixe que teremos que
comprar na praza.
O desenvolvemento dos plans urbanísticos
fará necesaria a ocupación e expropiación de
novos terrenos dos veciños, xa que serán precisos
equipamentos non contemplados neste plan xeral como novos
colexios, ambulatorios, novas conducións eléctricas,
de auga potable, de alcantarillado, nova estación
depuradora xunto á costa, etc.
O gasto público
preciso para a creación destas novas infraestructuras é
infinitamente maior cos supostos beneficios que ingresará o
concello.
Por todo isto, solicitamos:
Que se elabore
un novo plan xeral, de todos e para todos, que teña ó
pobo como protagonista.
Que se realice un estudio de
impacto ambiental que acredite que se respecta o medio rural e
natural, e a identidade de todas as parroquias. Que respecte as
cuestións ecolóxicas, con máis razón
despois das desfeitas que a Vía Rápida veñen
de producir sobre os vales de Coiro, Monte Liboreiro e montes de
Aldán.
Queremos un plan xeral pensado para o noso
pobo, elaborado por persoas dispostas a escoitar e recoller
propostas de mellora. Un plan xeral que antes se ser exposto
publicamente para parchealo conte co respaldo dos veciños
do concello e sexa por último exposto para recoller medidas
de mellora. Un plan xeral que na práctica mellore a
calidade de vida, respecte o medio ambiente e racionalice
infraestruturas. Un plan sen actuacións interesadas e
irresponsables que contraríen á vontade dos veciños
e veciñas de Cangas.
Queremos que se escoiten as
nosas voces. Queremos andar polos nosos camiños, beber das
nosas fontes, cultivar os nosos eidos, coidar do noso mar. En
definitiva, queremos decidir o noso futuro.
Aquí
estades todos vos demostrando que a vontade do pobo empeza a
medrar. Non deixaremos que nos anulen como pobo, nin que
reconvirtan os nosos espazos naturais, nin que nos convirtan nunha
cidade con desigualdades sociais.
Veciñas e veciños
de ALDÁN, HÍO, DARBO, COIRO E CANGAS
CANGAS
NON SE VENDE.
POR UN NOVO PLAN XERAL.
|
|
